Шымкент пен Барселона өзара әріптес
Пятница, 20 Ноябрь 2015 05:11
Дәстүрлі түрде өтетін «Ақылды» қала шарасына күллі әлемнің түкпір-түкпірінен қала басшылары, мамандандырылған ғылыми институттар мен инновациялық кәсіпорын жетекшілері шақырылады. Үздік жобаларымен ерекшеленген қалалар арасында Бостон, Торонто, Сидней, Хельсинки, Лондон, Гонконг, тағы басқалар бар. Өзінің үздік инновациялық жетістіктерімен ғаламды мойындатқан 10 кәсіпорынның қатарына бұл жолы Cisco, Audi, BASF, Bombardier, тағы басқалар енді. Шараға жиылған көпшілік қауым қала шаруашылығын басқару жүйесін, ондағы зияткерлік, технологиялық жобалардың үздік үлгілерін, тұрғын үй коммуналдық шаруашылығын жаңғырту жобасы бойынша алдыңғы қатарлы жетістіктерімен танысуға мүмкіндік алды.
«Ақылды» қала Халықаралық конгресс-көрмесі аясында Барселона мэрінің орынбасары Жерардо Писарелло мен Шымкент қаласының әкімі Ғабидолла Әбдірахымов екіжақты әріптестік кездесу өткізді. Кездесу барысында қос тарап өзара қарым-қатынастың негізгі бағыттары жөнінде пікір алмасты.
Бұл орайда, Ғ.Әбдірахымов Шымкент қаласы туризмнің дамуы, кәсіпкерлікті қолдау бағытында Барселонадан айтарлықтай тәжірибе алуға мүдделі екенін жеткізді. Сондай-ақ, Барселона тарабы Шымкенттің инфрақұрылымы мен ауылшаруашылығы саласын өркендету бағытында инвестиция салу мүмкіндігін қарастыратындығын мәлімдеді.
Шымкент – бүгінде елдегі жер аумағы бойынша бірінші, тұрғындарының саны бойынша екінші орынға ие. 2020 жылға дейінгі даму Тұжырымдамасы жобасын түзген Шымкент қаласы жергілікті тұрғындары мен саяхатшылар үшін ыңғайлы, заман талабына сай өркендеген қала ретінде аталады.
Қаланың бүгіні мен ертеңі екшелген құжат
Пятница, 20 Ноябрь 2015 04:56Шымкент тұрғындарға жайлы және таза, қауіпсіз, әрі кәсіпкерлік дамыған, заманауи да ерекше ғимараттарымен келбетті қала болуы қажет. Қаланың 2020 жылға дейінгі әлеуметтік-экономикалық даму Тұжырымдамасын дайындау барысында да осы сынды мәселелер негізге алынғаны анық. Барлық сала қамтылып, ауқымды да айқын, жан-жақты жоспарланған жоба жұрттың ертеңге деген сенімін нығайта түсіп, өзге өңірлердің қызығушылығын тудырды.
Бүгінде бұл құжат тұрғындарға жан-жақты түсіндіріліп, талқылануда. Үшінші мегаполистің бүгіні мен ертеңі екшелген құжатта әлеуметтік-экономикалық тұрғыдан дамудың жай-күйіне салыстырмалы талдау жасалынып, қаланың 2020 жылға дейінгі перспективалары көрсетілген. Сондай-ақ, даму тұжырымдамасында Шымкенттің республикадағы үшінші ірі қала мәртебесіне лайықты болуы, тұрғындардың қолайлы ортада өмір сүруі және қоршаған ортаны қорғау мәселесі көзделген. Орындалуы алдағы 5 жыл уақыт мерзіміне белгіленген аталмыш құжат ҚР Президенті
Н.Назарбаевтың Қазақстан халқына арнаған Жолдауларындағы басым бағыттары негізінде дайындалған. Концепцияның түпкілікті мақсаты - Шымкент қаласын тұрғындарға ыңғайлы және қонақтарға тартымды етіп көрсететін республикадағы заманауи мегополиске айналдыру. Ең алдымен, қала тұрғындарын толғандыратын негізгі мәселелерді шешу, қала тұрғындары мен қонақтарына қажетті инфрақұрылым жүйелерін жетілдіру, қалада бизнеске қолайлы жағдай жасау және инвестиция көлемі мен туристердің санын арттыру - қала әкімдігі үлкен басымдық беріп отырған міндеттер.
«Шымкент қаласының 2020 жылға дейінгі әлеуметтік-экономикалық даму Тұжырымдамасы» жобасының қалай жүзеге асырылатыны көпшіліктің қызығушылығын тудырып отырғаны мәлім. Осы орайда қала әкімінің орынбасары Бейсенбек Жанбосынов үй комитеті төрағалары мен көше комитеттері өкілдерінің басын қосып, «тұрғын үй-коммуналдық шаруашылығы саласының өзекті мәселелері» тақырыбында дөңгелек үстел өткізді. Онда қаладағы инженерлік-инфрақұрылымдық, коммуналдық қызмет саласының түйткілді мәселелері мен ертеңі кеңінен сөз болды.
Қазіргі таңда қалада ең өзекті мәселенің бірі – тозығы жеткен көпқабатты тұрғын үйлердің бүгінгі ахуалы. Кеңес өкіметі дәуірінде бой көтерген ғимараттардың бүгінгі жағдайы сын көтерер дәрежеде емес. Осы орайда, қала әкімінің орынбасары үй комитеті төрағаларын мемлекеттік тұрғын үйлерді жаңғырту бағдарламасы шеңберінде бірлесе жұмыс жасауға шақырды.
Шымкент қаласының «Даму» әлеуметтік картасы шеңберінде барлығы 42 елді мекенді сапалы электр жарығымен қамту жұмыстары межеленген болса, өткен жылы 5 елді мекенде трансформатор жүйелері жаңартылыпты. Биыл тағы 10 елді мекен тұрғындары сапалы электр жарығымен қамтылып отыр.
Қала аумағын табиғи газбен қамту жұмыстары да бүгінде белсенді түрде жүргізілуде. Атап айтқанда, күні бүгінге дейін қаладағы 81 елді мекеннің 36-сында «көгілдір отынмен» қамту жұмыстары аяқталып, тұрғындарға толық қуатында қызмет көрсетілуде. 34 елді мекенде тұрғындар табиғи газбен тек ішінара қамтылған болса, 11 елді мекенге әлі жетпеген.
Қала тұрғындарын жылумен қамту жұмыстарында бүгінде айтарлықтай түйткілді мәселелердің бары байқалады. Бастапқы жоспар бойынша, қала аумағында 82 мың пәтерді орталықтандырылған жылумен қамту меже етілген. Дегенмен, 17 мың пәтер иесі, яғни, бастапқы көрсеткіштің 20 пайызы жылуды автономды қазандықтан алғанды жөн көруде.
Қаланы сапалы таза ауыз суымен қамту бағытында да өзекті мәселелер жетерлік. Бүгінде тек, 57 елді мекен тұрғындары сапалы таза ауыз суын пайдалануда. Осы орайда, қала әкімінің орынбасары қаланың даму тұжырымдамасы жобасы шеңберінде аталған мәселелердің барлығы алдағы 5 жыл уақыт мерзімінде толық шешімін табатынын жеткізді.
Тұжырымдама жобасында ең әуелі, әлеуметтік саланың еңсесін тіктеуге мейлінше көңіл аударылғаны белгілі. Қаланың даму құжатында қаралған мәселені әлеуметтік сала қызметкерлерімен бірлесе талқылаған қала әкімінің орынбасары Гүлжан Құрманбекова жұмыспен қамту және медицина саласы бойынша баяндама жасады. Тұжырымдамада көрсетілгендей, 2016-2018 жылдары 2350 адам кәсіби қайта даярлықтан өтіп, тұрақты жұмысқа орналастырылатын болады. Айта кетейік, бүгінгі таңда жұмыссыздардың жалпы үлесі 5,3 пайызды құрайды, яғни, 23 мыңнан асып жығылады.
Денсаулық сақтау саласы бойынша бүгінде қаланың өзекті мәселесі ретінде аурухана және амбулаториялық емханалармен қамту деңгейін айтуға болады. Яғни, бұл мәселеде Шымкент қаласының көрсеткіші облыстық және республикалық деңгейден айтарлықтай төмен болып отыр. Мәселенің шешімін табу үшін, баяндамашы Тұжырымдама жобасы шеңберінде қаланың 7 тұрғын алабында (Қайнарбұлақ, Бозарық, Тұран, Құрсай, Жиделі, Бадам-1, Қайтпас-2) дәрігерлік амбулаториялардың құрылысын салу қажеттігі ұсынылғанын атап өтті.
Сондай-ақ, жиында білім, мәдениет, спорт саласы бойынша қала әкімінің орынбасары Қайрат Нұртай Тұжырымдама жобасының негізгі бағыттарына тоқталды.
– Қазіргі таңда білім саласы бойынша үш ауысымда жұмыс істейтін мектептер бүгінгі күннің өзекті мәселесіне айналып отыр. Қазір қалада үш ауысымда білім беретін 9 мектеп бар. Жыл сайын қаладағы бала саны 8 мыңға артып отырғанын ескерсек, бұл мәселеге дендеп көңіл бөлу қажеттігі аңғарылады, – деді Қайрат Ырзақұлұлы.
Бұл орайда, Тұжырымдамада 12 мектепті қайта құру, 11 жаңа мектеп және 7 балабақша құрылысын салу ұсынылған. Сондай-ақ, қала әкімінің орынбасары оқушылар арасындағы құқықбұзушылық көрсеткішін төмендету мақсатында мектепішілік электронды бақылау орнату, мектеп директорларын тағайындау конкурстарын ашық түрде өткізу, барлық білім беру мекемелерінде «Қамқоршылық кеңестерін» құру жайы ұсынылып отырғанын атап өтті.
Мәдениет саласын талдай келе, Қ.Нұртай Шымкент қаласы кітапханалар көрсеткіші бойынша республикалық орташа көрсеткіштен 4,2 есе, мұражайлар көрсеткішінде 2,2 есе төмен екендігін мәлім етті. Сондай-ақ, спорт саласында атқарылуы тиіс алдағы негізгі міндеттерге тоқталды. Яғни, мектептерде спорттық лигалар құру, жеке инвесторларды спорт нысандарын салуға тарту, спорттық функционерлер қызметін ұйымдастыру мәселелері Тұжырымдама жобасында қамтылған.
Қалалық мәслихат хатшысы Нұрлан Бекназаров жиын соңында сөз кезегін ала отырып, Шымкент – бүгінде ел аумағында дамуы тұрақты, болашағы айқын, қаржылық және адами тұрғыдан мүмкіндігі өте жоғары қала ретінде мойындалып отырғанын айрықша мақтаныш сезіммен айтты. Тұжырымдама жобасын талқылауға қатысқан қалалық ардагерлер кеңесінің, жастар ұйымдарының өкілдері және әлеуметтік сала қызметкерлері өз пікір-ұсыныстарын ортаға салып, даму құжатын қолдайтындықтарын білдірді.
Сондай-ақ, Шымкент қаласының 2020 жылға дейінгі әлеуметтік-экономикалық даму тұжырымдамасы бойынша жиын М. Әуезов атындағы мемлекеттік университетінде өтті. Оған қала әкімінің орынбасары Нұралхан Көшеров қатысып, жиналғандарды алдағы 5 жылда тұжырымдама аясында бизнес, туризм және ауылшаруашылығы саласында атқарылатын шаралардың жоспарымен таныстырды.
– Тұжырымдамада қаламыздың әлеуметтік-экономикалық жай-күйіне салыстырмалы талдау жасалынып, негізгі көрсеткіштерінің даму динамикасы мен өзекті мәселелер көрсетілген. Кәсіпкерлік саласын өркендету мақсатында әкімшілік тосқауылдарға талдау жүргізіліп, кешенді жоспар қабылданады. Жергілікті және шетел инвесторларын тарту үшін 100 жоба әзірленеді, - деді қала әкімінің орынбасары.
Н.Көшеровтің мәлімдеуінше, келер жылы ретсіз сауда орындарын жою мақсатында бірқатар жұмыстар жүргізіледі, кей базарлар қала сыртына көшіріліп, қайта құрудан өтеді. Туризмді дамыту мақсатында қаламыздағы туристік компаниялар Ресей, Қытай мемлекеттерімен бірлескен заманға сай түрлі бағдарламалар әзірлеп, маршруттар ұсынады. Сонымен қатар әуежай, темір жол вокзалы мен ойын-сауық нысандарын салуға инвесторлар тартылмақ.
Даму құжатының басым бағыттары талқыланған жиында Тұрғын-үй құрылыс жинақ банкі ОҚО филиалының директоры Қасымбек Мәліков, ОҚО кәсіпкерлер палатасы директорының орынбасары Мақсат Қасымбеков, және басқа да кәсіпкерлер сөз алып, ой-пікірлерімен бөлісті. Өз кезегінде, қала әкімінің орынбасары кәсіпкерлерді алға қойған міндеттерді бірлесе отырып жүзеге асыруға шақырды.
Жеңiмпаздар келіп...
Пятница, 06 Ноябрь 2015 05:19жастар жігерленді
Қазақстан велоқауымдастығы ОҚО филиалы мен Шымкент қаласы әкімдігінің қолдауымен, «Rixos Khadisha Shymkent – 2015» қайырымдылық велошеруі өтті. Спорттық шерудің өзіндік ерекшелігі сол, шараға әлемдік аренада есімі белгілі болған Александр Винокуров, Серік Сәпиев және Зүлфия Забирова сынды спортшылар арнайы келіп қатысты. Сонымен қатар, спортшылар Шымкент қаласының әкімі Ғабидолла Әбдірахымовпен, сондай-ақ, қалалық №2 балалар мен жасөспірімдердің спорт мектебінің шәкірттерімен де кездесті.
Спорттың белгілі бір түрін немесе салауатты өмір салтын насихаттаудың жолы көп. Шымкент қаласының әкімдігі бұл мәселеге жаңаша қырынан келуді көздеді. Үшінші мегаполиске есімі әлемге танымал спортшылардың келіп, жастардың арасынан табылуы соның бір көрінісі.
Спортсүйер қауым мен Олимпиада чемпионы болуды армандап, ел Туын әлемдік ареналарда желбіреткен спортшыларға еліктейтін жастар демалыс күндері Шымкентте өткен іс-шараның куәгері болды. Жас спортшылар даңқты ағаларымен жақынырақ танысып, әңгімелесуге мүмкіндік алды. Екі дүркін әлем чемпионы, 2012 жылғы Олимпиада чемпионы, Вэл Баркер кубогының иегері Серік Сәпиев пен Лондондағы XXX жазғы Олимпиада ойындарының чемпионы, Сидней Олимпиадасының вице чемпионы, әлем біріншілігінің қола жүлдегері, «Вуэльта» көпкүндігінің жеңімпазы Александр Винокуров, халықаралық жарыстарда алдына жан салмаған велошабандоз Зүлфия Забирова қайырымдылық велошеруге қатысып, жас спортшылармен кездесу өткізді.
Шымкент қаласының әкімі Ғ.Әбдірахымовпен бірге қаладағы №2 жеңіл атлетика және велоспорт мектебінде жас спортшылармен кездескен А.Винокуров мектеп ұжымына «Vino» кәсіби спорттық велосипедін сыйға тартты. Жастарға еліміздің байрағын әлемдік жарыстарда жоғары көтеруге тілектестігін білдірді. Өз кезегінде қала әкімі мұндай кездесулер жас спортшыларға қанат бітіретінін, жеңіске талпынысын еселейтінін айта келе, даңқты спортшыларға алғысын жеткізді.
«Rixos Khadisha Shymkent-2015» қайырымдылық велошеруіне жүзден астам спортшы қатысты. «Rixos Khadisha Shymkent» қонақүйінен басталған шеру қашықтығы – 15 шақырым. Яғни, қатысушылар Желтоқсан, Қонаев көшелері арқылы «Наурыз» алаңына жетіп,
қонақүйге қайта қайырылды. Велошеруде белсенділік танытқан қатысушыларға «Алғыс хат» пен бағалы сыйлықтар табыс етілді. Спорттық шара соңы қайырымдылық аукционына ұласты. Мұндай іс-шаралар спорттың дамуына ықпал ететініне тоқталған А.Винокуров демеушілерге алғыс айтты. Сөйтіп, аукционда Александр Винокуровтың Лондон Олимпиадасында киген жейдесі 120 мың теңгеге сатып алынды. Ал Зүлфия Забированың веложейдесі 50 мың теңге болды. Олимпиада чемпионы Серік Сәпиевтің қол қойған бокс қолғабы 150 мың теңгеге сатылса, «Вуэльта – Испания-2015» көпкүндігінің жеңімпазы Фабио Арудың жейдесін 90 мың теңгеге алушылар табылды. Аукционда ең қымбат бағаланған, Александр Винокуров үшін арнайы жасалған «Uno» брендіндегі велосипед
1 млн 650 мың теңге болып, жаңа иесін тапты. Оны «Смарт Ойл» компаниясының басшысы Ерлан Нұрханов сатып алды. Сондай-ақ, электрмоторлы, жалқы дана велосипед 900 мың теңгеге бағаланды.
Қайырымдылық аукционнан түскен қаржы елдегі велоспорт мектептеріне қажетті жабдықтар алуға жұмсалатын болады.
«Street Workout» – салауатты өмiр салтына баулиды
Пятница, 06 Ноябрь 2015 04:46Шымкентте Қошқар ата өзенінің бастауынан алғашқы «Street Workout» спорттық алаңшасы ашылды. Көше фитнесі атауымен көпшілікке танымал спорттық алаңшада әуесқой тұрғындар белтемір, қырлы бөренелер, швед қабырғалары мен көлбеу сатыларда және басқа конструкцияларда жасалатын дене шынықтыру жаттығуларын жасауға мүмкіндігі бар.
Шараға қатысқан қала әкімі Ғабидолла Әбдірахымов қала тұрғындарын салауатты өмір салтын ұстануға шақырып, құттықтау лебізін жеткізді.
– Демеушілер есебінен алдағы уақытта Шымкентте дәл осындай 10 алаңша салынатын болады. Және оның екеуі
халықаралық талапқа сай болмақ. Пайдалануға беріліп отырған бүгінгі алаңша халықаралық деңгейдегі түрлі бәсекелерді қабылдауға әзір, – дейді қала әкімі.
Осыдан 10 жыл бұрын АҚШ елінде пайда болған «Street Workout» спорттық бағыты бүгінде елімізде қарқынды түрде дамып келеді. Аталмыш спорт түрімен бүгінде Шымкент қаласында 3000-ға жуық жастар айналысуда.
Қала әкімі сондай-ақ, спортшылармен арнайы кездесіп, алдағы жоспарларымен танысты. Кездесуге келген спортшылар қатарында есімі көпшілікке танымал Мұхтархан Ділдәбеков, Әлия Юсупова, Біржан Жақыпов та бар.
Миллионер қала атануға мүмкіндік мол
Пятница, 16 Октябрь 2015 08:22Шымкент алдағы бірер жылда «миллионер» қала атанбақ. Бұл тұрғыда, Шымкент қаласы өзге шаһарлармен салыстырғанда халық ең тығыз қоныстанған орталық ретінде бағаланады әрі қаладағы демографиялық өсім де жоғары. Еліміздің әлеуметтік-демографиялық тарихында Шымкент қаласының орны ерекше.
Шымкент қаласында статистикалық мәлімет бойынша, қала халқының саны 878 мың адамды құрайды. Қалыптасқан өсім көрсеткіші осы қалпында сақталатын болса, жергілікті халық санын миллионға дейін жеткізу межесі 2019 жылдың үлесіне тимек.
Мамандар мұндағы демографиялық өсім өзге өңірлерге қарағанда әлдеқайда жоғары екенін айтады. Мұндай оң өзгерістің байқалуында – ішкі және сыртқы миграцияның үлесі де зор.
– Қаланың жыл сайынғы табиғи өсімі орташа есеппен 2,4 пайызды құрайды, – дейді қалалық жұмыспен қамту және әлеуметтік бағдарламалар бөлімі басшысының орынбасары Бауыржан Қуанышбеков. – 2019 жылға қарай халық саны жағынан миллионды еңсереміз деген жоспарымыз бар. Әрине, бірінші кезекте халықтың әлеуметтік әлеуетін жақсарту жайы басты назарда болмақ. Айта кетейік, қала халқының өсімі ішкі көші-қон есебінен де жылдан жылға ұлғая түскені байқалады. Тек, өткен жылы қала аумағынан тиісінше, 400-ден астам адам өзге қалаға қоныс аударса, 1 100-ден астам адам шымкенттік атанған.
Мамандардың айтуынша, халық санының ұлғаюына мемлекеттік «Нұрлы көш» бағдарламасының тигізген септігі мол. Атап айтқанда, 2013 жылы 2044 адам немесе 1029 отбасы оралман мәртебесін иеленген болса, өткен жылы 641 адам немесе 332 отбасы, ағымдағы жылы 178 адам немесе 64 отбасы оралман мәртебесін алып, тіркелген.
Зообақ қайта жандануда
Пятница, 16 Октябрь 2015 07:31Шымкент мемлекеттік зоологиялық саябағына биыл – 35 жыл. Мерейлі датаны салтанатты жағдайда атап өткен мекеме қызметкерлері қала тұрғындарына ашық есік күнін ұйымдастырып, тегін кіруіне мүмкіндік жасады. Шараға қала әкімі Ғабидолла Әбдірахымов қатысып, көпшілікке құттықтау лебізін жеткізді.
– Хайуанаттар бағы – бұл ғылыми, мәдени ағарту орталығы, табиғатта сирек кездесетін және жойылып кету қаупі бар аңдарды сақтап қалу орталығы, ең негізгісі – бұл жер балалар мен ересектер демалатын орын болып табылады. Зообақ алғаш ашылған кезде иелігінде 75 түрлі аңның 350 данасы болыпты. Қазіргі кезде, зообақ коллекциясында 212 түрлі жан-жануардың 2200-ден астамы тіршілік етуде, – деді
Ғ.Әбдірахымов.
Зообақтың тиімділігі мен маңызы аса жоғары екенін айрықша атап өткен қала әкімі мекеме қызметкерлеріне қар тазалағыш техника тарту етті.
Айта кетейік, зоологиялық саябақтың жалпы алаңы 30 гектарды құрайды, оның 19 гектар аумағына экспозиция орналастырылған. Мұндағы аң-құстардың 43 түрі Қызыл кітапқа енген.
– Бүгінгі таңда зообақта аумақты игеру жұмыстары толығымен іске асып жатыр. Атап айтқанда, қазіргі заманға сай зоогеографиялық экспозицияларына «Африка», «Түнгі әлем», «Тау» атауымен арнайы орындардың құрылыс жұмыстары жүргізілуде. Осы салынып жатқан аумақтарда жануарлардың әрбір түр ерекшелігіне, олардың табиғи жағдайда өмір сүру ортасына жақын жағдай жасалып жатыр. Яғни, зообағымыздың келушілері жануарларды темір тор арқылы емес, ашық түрде тамашалай алады, – дейді зообақ басшысы Нұрғазы Бұхарбаев.
Сондай-ақ, мекеме басшысы алдағы бір жыл уақыт мерзімінде «Шымкент қаласының құрметті азаматтары» мен БАҚ өкілдері үшін жанұясымен бірге, зообаққа тегін кіруіне жағдай жасалғанын да атап өтті.
Байқаудың бас жүлдесi Мелдебековтер әулетiне бұйырды
Пятница, 18 Сентябрь 2015 07:55Отбасы күніне орай, ұлттық құндылықтарды дәріптеу мақсатында Шымкент қалалық ардагерлер кеңесі ел аумағында жаңа жоба - «Үлгілі отбасы» байқауын ұйымдастырды. Қалалық балалар мен жасөспірімдер орталығының ғимаратында өткен ардагерлер арасындағы байқауға аудандық деңгейде үздік деп танылған 7 отбасы қатысты.
Өнерге кең өріс берген үміткерлер арасынан үлгілі отбасын анықтау қазылар алқасы үшін де оңайға түскен жоқ. Қалалық ардагерлер кеңесі төрағасының орынбасары Сейдахмет Байдәулетов бастаған әділ қазылар алқасы әрбір отбасының өнері мен қарым-қабілетін бағамдай отырып, лайықты бағасын беріп отырды.
– Байқау барысында біз шын мәнінде, отбасылық тәрбиенің үздік үлгілерін және қазақ этнопедагогикасындағы отбасы тәрбиесі құндылықтарын насихаттап, «Үлгілі отбасы» моделін құру, ата-ана мен бала және ерлі-зайыптылар қарым-қатынасын жетілдіру, үлгілі отбасын анықтау және олардың татулығын арттырып, қолдау көрсетуді өзіндік меже етудеміз, – дейді Сейдахмет Әуелбекұлы.
Байқауда отбасы мүшелері өздерін таныстырып, өнерлерін көрсетті. Әдет-ғұрып, салт-дәстүрге байланысты қойылған сұрақтарға жауап беріп, білім сайысында сынға түсті. Өз әулетінің шежіресінен, тарихынан дерек беретін фото-слайдтар мен бейнеүзіктер де әділқазылар тарапынан тиісті бағасын алып жатты.
Сонымен, әділқазылар алқасының шешімімен, 4 отбасыға ынталандыру жүлдесі табысталды. Атап айтқанда, Амановтар, Усмановтар, Досановтар және Серімбаевтар әулетіне арнайы дипломмен қоса, ақшалай жүлде берілді.
Байқау жүлдегерлері арасынан үшінші орын – Абдуллаевтар отбасына бұйырды. Ұлы Отан соғысының ардагері Жұман Абдуллаев 52 жыл ғұмырын темір жол саласын өркендетуге арнаған ардақты азамат. «Ленин» және «Еңбек Қызыл Ту» ордендерімен марапатталып, отанасы Қызмария екеуі отбасында бүгінде 8 ұл-қыз, 18 немере, 22 шөбересі тәрбиелеп отыр. «Батыр ана» атанған Қызмария апа да бірнеше мәрте Құрмет грамоталарын иеленген. Байқау барысында алғырлығы мен шеберлігін көпшіліктің алдында паш еткен Абдуллаевтар әулетіне арнайы диплом мен 100 мың теңге ақшалай сыйақы табыс етілді.
Көпшілік күткен екінші жүлдеге – Үсенбековтер отбасы ие болды. 2 ұл, 2 қыздан 12 немере сүйіп отырған Өмірбек ақсақал қай кезде де ұрпағын қарапайымдылыққа тәрбиелеп, үлкенді сыйлау, ата-ананы құрметтеу дәстүрін берік ұстануға шақырудан жалыққан емес. Әділ қазылар алқасының шешімімен, білім-парасаты өзгелерден даралана білген Үсенбековтер отбасы дипломмен қоса, 150 мың теңге сыйақыға ие болды.
Шаңырағы шаттыққа бөленген Мелдебековтер отбасы – кімге де болса үлгі екендігі осы байқау барысында және бір дәлелденді. Бұл жолғы байқауда «жүзден жүйрік» ретінде танылған ардагер Әбдімұрат қажының отбасы қашанда үлгілі әрекетімен есімдері көпшілікке кеңінен танылған. Отанасы Қаламқас апа әркез түрлі пән олимпиадаларында жеңімпаз атанып жүрген Әмина, Әлібек, Нуриза, Асылхан, Динара, Әлиханның есімдерін мақтаныш етеді. Бұдан бөлек, Айдана республикалық байқаудан «Көркем ару» номинациясын иемденген болса, Жандәулет жуырда ғана грек-рим күресінен ел біріншілігінің жеңімпазы болып оралыпты. Талантты ұл-қыздарының қызықшылығын көріп, әрбір жетістігіне сүйсіне білетін «Алтын алқа» иегері Қаламқас апа «Отан отбасынан басталатынын» әркез әңгімелеп отыратыны бар. Балалардың тәрбиесінде еңбекқорлық, үнемі ізденіс, әділдікті басшылыққа алады екен.
– Үлкенге құрмет, кішіге қамқор бола білуді бала кезден бойға сіңіру маңызды. Бұл қазақы тәрбиенің негізі. Бала бойында адамгершілік қасиеттерді тәрбиелеуге үлкен мән берген жөн. Наныңды адал еңбекпен табу керек. Үлгілі болуға ұмтылған отбасы өзінің жанұясына ғана емес, қоғамға да мейірімді болуы тиіс. Қоғамда қазір жетім-жесір, қариялар көп, мұндайды болдырмауға атсалысып, жанашырлық көзқараспен қарау қажет, – дейді байқауда үздік шығып, жаны тебіренген Қаламқас апа.
Иә, алғаш рет ұйымдастырылған айтулы доданың жеңімпаздары – Мелдебековтер отбасы өнегелі жанұядан үлгілі ұрпақ өседі деп есептейді. Шаңырақ берік болуы үшін жастарға төзімділік пен сабырлық танытып, отбасылық тәрбиенің жақсы сабақтастығын үзбеуге кеңес береді. «Үлгілі отбасыға» диплом мен 200 мың теңге жүлдені табыс еткен қалалық ардагерлер кеңесінің төрағасы Исамуддин Рысбай өз кезегінде, барша ардагерлер қауымын «Отбасы күнімен» құттықтады.
Оқу-жаттығу жұмыстары пысықталды
Пятница, 18 Сентябрь 2015 06:09Облыстық төтенше жағдайлар жөніндегі департаменті Шымкентте азаматтық қорғаныс бойынша оқу-жаттығу жиындарын өткізуде.
Алдымен қалалық әкімдік ғимаратында облыстық, қалалық деңгейдегі мемлекеттік мекеме жетекшілерінің қатысуымен оқу-жаттығу жиындарының барысы тағы бір тиянақталды. Жиынға облыс әкімінің орынбасары Сәкен Қаныбеков, Шымкент қаласының әкімі Ғабидолла Әбдірахымов қатысып, жауапты сала мамандарына нақты міндеттер жүктеді.
Оқу-жаттығу жиындары қыркүйек айының 15-18 жұлдызы аралығын қамтиды. Осы күндері дабыл сигналдары қағылып, төтенше жағдайлардың алдын алу бағытындағы ауқымды шаралар атқарылуда. Мақсат – қаладағы шаруашылық нысандардың табиғи және техногенді сипаттағы төтенше жағдайларға әзірлігін тексеру.
Алғашқы күні жер сілкінісі жағдайындағы дабыл қағылып, сала қызметкерлері осы апат түріне сай әрекет етті. Жоғары оқу орындарының студенттері ашық алаңқайларға шығарылып, қауіпсіздік шаралары жасалды.
– Биыл жедел құтқару және өрт сөндіру жасақтары су жаңа құрылғылармен қамтамасыз етілді. Жасақтың жаңаша кейіпке енуі үшін қала бюджетінен 25 миллион теңге қаржы бөлінген, – дейді ОҚО ТЖД бастығының орынбасары Батырғали Сопбеков.
Жаттығу жиындары барысында облыстық төтенше жағдайлар жөніндегі департамент басшылары көрмедегі қауіпсіздік құрал-саймандарымен танысып, оң бағасын берді. Бұл орайда, жаттығу жиындарын жоғары деңгейде ұйымдастыра білген сала мамандары қандай да бір төтенше жағдайлардың алдын алуға әзір екендігін айтады.